Lehendabizi, jakin beharra dago, gasezko turbinadun Ziklo Konbinatuko Planta (PCC) baten eginkizun nagusia gasa energia elektriko bihurtzea dela.
Eta ziklo konbinatukoa deitzen bazaio, gasezko eta lurrunezko turbinen beroaren sorkuntza-zikloak "konbinatzen" dituelako da, hain zuzen ere. Bi turbinen zikloak konbinatuz eraginkortasun handiagoa eta energi kontsumo txikiagoa lortzen da.
Plantak duen gasezko turbina hegazkinen motoreen bertsio industriala da (JET) eta turbina horrentzat erabili ohi den erregaia gas naturala da. Motorearen mugimenduak berez sortzen du elektrizitatea, baina, gainera, gasezko turbinak sortzen duen beroa, gero, galdara batera pasatzen da, lurrunezko turbinan erabiltzen den lurruna sortzeko; lurrunezko turbinak generadorea martxan jartzen du eta berriro ere elektrizitatea sortzen da. Eragiketa bikoitz horri Ziklo Konbinatua deitzen diogu. Oso teknologia eragingarria da, zeren, energia berbera kontsumituta, Zentral Termikoak sortzen duen elektrizitatea baino heren bat gehiago sortzen baitu.